жинақы қорғаныс

(Оборона мобильная)

АҚШ, Ұлыбритания, Жапония және басқа да мемлекеттердің армияларында қарастырылған қорғаныс түрі. Ж.қ-тың пайда болуы армиялардың ядролық қарумен қарулануына байланысты және 1950 жылдардың орта шеніне қатысты. Ж.қ-тың мәні — қорғанудың барынша белсенділігінде және оны шабуылдаушы қарсыластың басты күштерін талқандауға ыңғайлы қорғаныс түбінде орналасқан аудандарға әдейі жақындатып, сонан соң барлық құралдардан ату арқылы, қарсы шабуылмен және қарсы соққылармен жоятын қорғану-шабуылдау қимылдары әдісімен жүргізілуінде. Бұл үшін күштер мен құралдардың (2/3-ге дейін), әсіресе сауытты танктердің үлкен бөлігі қорғаныс түбіне екінші эшелон (резерв) құрамында орналасады, ал қалғандары (1/3-ге дейін), негізінен, мотожаяу әскерлер бірінші эшелонда болады. Ж.қ-ты қойылған (берілген) тапсырмаға, уақытша аймаққа бөлінгеніне қарамай, оны жергілікті жер әскерлерінің маневр жасауына қолайлы болып тұрғанында қолданған дұрыс. Қарсыластың басты күштерін тарту қарастырылған ауданда бірінші эшелон бөлімшелерінің (бөлімдерінің) бір бөлігі, ал кей жағдайларда екінші эшелон күштерінің бөлігі соңынан ұрыс қимылдарын жүргізетін бекіністер даярланады. Олардың міндеті — орналасқан бекіністерін берік ұстау және жаудың қаптал жаққа және түбіне қарай жылжуына жол бермеу. Қарсыластың корпус қорғанысының бірнеше бағыттарына бір уақытта қарсы соққы берген жөн, жауды ядролық қарумен, артиллериядан оқ ату арқылы және авиация соққысымен жойған дұрыс.